Vrouekeur - Nuutste Uitgawe Vrouekeur - Latest Issue

9 MAART 2012 - ELKEEN VAN ONS IS UNIEK EN 'N JOLLY WONDERWERK!

Die meeste mense wat ek ken, is trots op hul uniekheid. Tog kan ons nie ontken dat ons, ten spyte van ons eiesoortigheid, nie in isolasie kan leef nie.

 

 

 


Die meeste mense wat ek ken, is trots op hul uniekheid. Tog kan ons nie ontken dat ons, ten spyte van ons eiesoortigheid, nie in isolasie kan leef nie. Ons is net regtig mens in ons interaksie met ander, of dit nou in ’n werks-, gesins-, familie- of vriendskapsverband is. Dis vir my opvallend dat ’n paar van dié week se artikels menswees binne kleiner en groter sosiale kringe aanraak.

Dalk brand jy om jou kind se dagboek te lees om uit te vind wat in haar of sy kop aangaan (of dalk wroeg jy juis omdat jy dit gelees het!). Of die reuk van gesigpoeier vat jou ook summier terug na jou ouers se kamer waar jy as vyfjarige in jou ma se spykerhakkies rondtrippel terwyl sy regmaak om saam met jou pa na ’n werksgeleentheid te gaan. Miskien voel jy as gevolg van jou seksuele oriëntasie geostraseer, veroordeel en verontreg of voel ’n dierbare vriend of familielid van jou só.

Die punt is, ons wil almal geliefd voel, aanvaar word en deel van ’n gesin, familie, vriendekring of groter gemeenskap wees, ongeag ons eiesoortigheid. En dis nie altyd so maklik nie, want mense se persoonlikhede bots, omstandighede maak dit moeilik of ander se ideologieë en waardestelsels strook nie met ons s’n nie. Soms kan dit voel die lewe is meer van ’n gesukkel as ’n genot en die struikelblokke net te veel en te groot om te oorkom.

Die interessante is, dit was van die begin van ons ontstaan die geval. Dit het ek net weer eens besef toe ek onlangs na ’n briljante dokumentêre DVD van die BBC gekyk het. Inside the Human Body vat jou presies daarheen – binne-in ons lywe. Dis dan wanneer jy verstaan dat jy inderdaad uniek en spesiaal is – eintlik ’n jolly wonderwerk. Maar moenie dink dit

was of is ’n proses sonder struikelblokke nie – aikona!

wys die kyker presies hoe ingewikkeld elkeen van ons se menswording was. Van ’n gemiddelde 250 miljoen spermselle is dit net enetjie wat die reis, met menige struikelblok in die pad, suksesvol afgelê het om uiteindelik met fenomenale presisie een spesifieke eiersel te bereik. Die manjifieke proses wat plaasvind om te verseker dat ander spermselle nie ook deel van die bevrugtingsproses word nie, is, om die minste te sê, verbysterend. Die daaropvolgende selverdeling en verdere ontwikkeling van die unieke jy laat jou gewoon sprakeloos van verwondering.

 

 

Inside the Human Body

Nog ’n interessantheid: Ons weet dat elke vrou met al die eierselle wat sy in haar leeftyd sal hê, gebore word. In effek beteken dit die eiersel wat jou gemaak het, was reeds aanwesig toe jou ouma met jou ma swanger was. Dit beteken ’n deel van my was reeds voor my ma se geboorte rustig besig om vir ’n groot dag baie jare later te wag. Ek is dus nie net 51 jaar oud nie, maar ’n deel van my is reeds amper 76 jaar oud!

Dit laat my dink dat ons almal tot soveel meer in staat is as wat ons dink. Ons was immers elkeen ’n wennerspermsel wat ’n moeilike reis suksesvol afgelê het tot by daardie een spesiaal voorbereide eiersel. Dit het perfekte tydsberekening geverg, ons moes ’n hengse klomp struikelblokke oorwin en belangrikste van alles: Was dit twee ander selle of selfs net ’n ander sperm- of eiersel, was jy nie jy nie en ek nie ek nie.

Maar dit beteken ons moet geduldig wees en die regte oomblik afwag. En as die oomblik aanbreek, moet ons nie weifel of vir struikelblokke skrik nie, want doen ons dit, mis ons die geleentheid om ons eie wonderlike reis tot unieke menswees te ervaar en vervul.

As ’n mens verder nadink oor wat die wonderwerk van menswording en menswees regtig behels, gaan ons straks ook nie ons medemens so maklik veroordeel nie, maar hulle eerder in verwondering as uniek en spesiaal aanvaar.

 

Tot volgende keer.

Welkom by die Vrouekeur aanlyngemeenskap!

Vertel ons meer van jouself sodat ons aan jou behoeftes kan voldoen. Klik hier om ʼn vinnige, anonieme digitale meningsopname te doen.

Kommentaar
Wees eerste om kommentaar op die artikel te lewer.
Jy moet ingeskakel wees om kommentaar op die artikels te kan lewer. Indien jy nog nie 'n aanlyn-profiel het nie, kan jy hier een skep

Caxton Tydskrifte moedig vryheid van spraak aan en ‘n verskeidenheid standpunte word hier weergegee. Die menings van die gebruikers van vrouekeur.co.za is hul eie en nie noodwendig dié van Caxton Tydskrifte nie.
Interessante artikels
Meeste kommentaar
Nuwe sjef skud die vere by Catharina’s Restaurant, Steenberg
Catharina’s Restaurant by Steenberg Vineyards in Constantia het 'n nuwe uitvoerende sjef en hy is nie bang vir interessante spyskaarte en disse nie.
Kuns uit eie bodem: Pierneef
Wat ’n mens se siening van Pierneef ook al is, jy kan sy belang as landskapskilder in die Suid-Afrikaanse kunsgeskiedenis nie ontken of afmaak nie
VIDEO: Kyk hoe goed is die kunstenaar
Wat 'n ongelooflike verbeelding het hy nie?!
LEES & STEM (Maart 2015): Vat so, jou feeks
Ek het nog altyd ’n hekel daaraan gehad as dit kom by onregverdigheid op die sportveld. Soos die spreekwoord lui, het elke wedstryd sy beserings, maar...
LEES & STEM (Januarie 2015): Die cowboy
Ons woon hier op ’n plaas in die Weste, die beste Weste, eintlik die Noordweste.
LEES & STEM (April 2015): Die agterstallige paaiement
In elke winkel is die poppe snoesig en warm geklee met bypassende stewels en ’n handsak. Die pop in die een vertoonvenster trek onmiddellik Lulu se...
© 2017 www.vrouekeur.co.za | Alle regte voorbehou | Developed By Digital Platforms