Foto: Verskaf
Jacaranda FM het vandag Suid-Afrika se lang verwagte, blinknuwe ontbytprogram – Breakfast with Martin Bester & Tumi Morake – lewendig op die lug bekend gestel.
Persverklaring: Jacaranda FM
Martin is vir drie agtereenvolgende jare gekies as SA se gunsteling radio-aanbieder en is ook ‘n rockster, Afrikaanse sanger, televisie-aanbieder en akteur. Tumi Morake is SA se top vroulike komediant, TV ster, bekroonde aktrise, skrywer en ma van drie.
Beide Martin en Tumi bring ‘n wonderlike vermenging van persoonlikheid na die radiogolwe – Martin wat trots Suid-Afrikaans, groothartig en vrygewig is en Tumi wat braaf, snaaks en super skerp is. Saam is hulle gerat om ‘n energiebelaaide ontbyt op te dis wat bekend, maar skerpsinnig, trots Suid-Afrikaans, sorgsaam en EG is.
LEES OOK: Meer oor Martin Bester
Beide aanbieders sê dat hulle gereed en oorgehaal is om weg te spring met Suid-Afrika se beste ontbytprogram.
Martin sê: “Dis ‘n baie opwindende uitdaging – splinternuwe, toonaangewende materiaal. Ons het ‘n fantastiese span en ek is ‘n aanhanger van elke individuele rolspeler, veral Tumi. Ek is mal oor haar energie en sin vir humor en die feit dat sy ‘n ding op die naam noem. Dis ook ‘n reuse voorreg om ontbyt te kan geniet saam met die mees invloedryke, hardwerkende gehoor in die land en ons kan nie wag om op die lug te kom nie!”
Tumi sê dat dit vir haar ‘n definiërende oomblik in haar loopbaan is: “Om deel te word van ‘n kraakvars nuwe ontbytprogram en my tande in radio te slyp is beide angswekkend en opwindend. Dié is vir my ‘n goue geleentheid om saam met een van die beste radio-aanbieders in Suid-Afrika te werk en om ook sy groupie te wees wanneer hy sing! Ek het alreeds so baie by Martin geleer en die span is uiters dinamies!”
Jacaranda FM se Algemene Bestuurder, Kevin Fine, sê: “Martin en Tumi is aan die kruin van hulle velde en maak die perfekte kombinasie vir ‘n splinternuwe, nog-nooit-vantevore-gedoen-nie program. Die gehoor sal baie vinnig hulle harte op dié twee verloor.”
Programbestuurder, Gavin Meiring, glo dat hierdie span ontbytradio in Suid-Afrika gaan definieer: “Martin Bester het ‘n uitstekende begrip van ontbytradio en om hom met iemand van Tumi Morake se kaliber saam te span gaan sensasioneel wees.”
Breakfast with Martin Bester & Tumi Morake sal 3 Julie 2017, tussen 6 en 9 vm, op die lug wees, met meer as ‘n kwart miljoen rand te wenne in die eerste week van die program.
