Murgpampoentjie-en-sampioen-lasagne

Maak maklike en heerlike disse met groente. Selfs die kinders sal nie hul neuse daarvoor optrek nie!

4 porsies

BESTANDDELE
250 g (1 pakkie) lasagnevelle
bietjie olie
2 uie, gekap
5 ml (1 t) vars knoffel, gekap
2,5 ml (½ t) droë basiliekruid
500 g (2 pakkies x 250 g) sampioene, in skyfies gesny
500 g murgpampoentjies, in dun skyfies gesny
400 g (1 bottel) tamatiepastasous
10 ml (2 t) suiker
sout na smaak
peper na smaak

KAASLAAG
45 ml (3 e) botter
45 ml (3 e) koekmeel
375 ml (1½ k) warm volroommelk
250 g (1 bakkie) laevet roomkaas
2 ekstragroot eiers
2,5 ml (½ t) sout
knypie peper
250 ml (1 k) mozzarellakaas, gerasper

BOLAAG
250 ml (1 k) mozzarellakaas, gerasper

Stel oond op 180 °C.

BESTANDDELE

1. Verhit bietjie olie en soteer uie, knoffel en basiliekruid tot ui sag is.
2. Voeg sampioene by en soteer tot meeste vloeistof verdamp het.
3. Skep sampioenmengsel uit en hou eenkant.
4. Verhit nog olie indien nodig en soteer murgpampoentjies tot sag.
5. Skep sampioenmengsel terug in kastrol. Voeg tamatiepastasous en suiker by. Geur na smaak met sout en peper.
6. Prut groentemengsel oor lae hitte vir 15 minute tot sous verdik.
7. Kaaslaag Smelt botter in kastrol. Roer koekmeel by tot ‘n bal vorm. Voeg klein bietjies warm melk op ‘n slag by terwyl jy roer. Roer tot glad en sonder klonte.]
8. Laat prut vir 2 minute of tot sous begin borrel. Verwyder van hitte. Laat bietjie afkoel.
9. Roer roomkaas, eiers, sout, peper en mozzarellakaas by en roer tot goed gemeng.
10. Pak lasagnevelle in 22 cm x 32 cm-oondbak wat met kossproei gespuit is.
11. Skep helfte van murgpampoentjiemengsel op. Skep helfte van kaasmengsel op. Maak gelyk.
12. Pak weer laag lasagnevelle op. Skep oorblywende murgpampoentjiesmengsel op.
13. Pak weer lasagnevelle op murgpampoentjiemengsel en skep dan oorblywende kaasmengsel bo-op.
14. Bolaag Sprinkel mozzarellakaas oor.
15. Bak vir 45 minute of tot toetspen deur lasagnevelle kan steek.
16. Sit warm voor.