Sjef: Francois du Toit | Vrouekeur

Sjef: Francois du Toit

Pampoenkoekies

Francois du Toit is die sjef van die restaurant op die organiese wynplaas, Waverley Hills, tussen Tulbagh en Wolseley

Deur Maryke Roberts

Foto’s verskaf

Hy vertel dat hy op ’n plaas in Paardeberg by Malmesbury grootgeword het en altyd te doen gehad het met kosmaak saam met sy ouma en ma. Die somerspyskaart met sy ligter disse en ryk geure is nou by die restaurant beskikbaar en die gewilde pampoenkoekies is weer terug.

Waar die kom die pampoenkoekieresep vandaan?

Die pampoenkoekies het so effens van ‘n kultus die afgelope 2 jaar opgebou, so ek moet dit op die spyskaart hou. Ek dink dit prikkel baie mense se nostalgie. Dit is my ma se resep wat ek so effe aangepas het.

Wat is vir jou die veelsydigste bestanddeel om mee te werk?

Tamatie, sojasous, uie, rooiwyn… die lys is oneindig, maar ek kan nie sonder uie werk nie. Daardie gekaramelliseerde reuk en om te proe…

As jy jou kookstyl in een woord moet beskryf, wat sal dit wees?

Veelsydig

Hoe moeilik is dit om ’n sjef op ’n wynplaas te wees – bind die wyne jou of gee dit jou kans om te eksperimenteer?

Ek dink enige sjef wat sy sout werd is, pas volgens sy perke aan. Perke is goed, want dit daag jou uit  om iets anders binne daardie perke te doen. Elke jaar se wyne se karakter verander en uiteindelik ook die perke. So nee, dis eintlik vir my makliker.

Waar kry jy inspirasie vir nuwe disse?

Soms op snaakse plekke; ´n foto, ‘n spesifieke bestanddeel waarom ek ‘n dis bou, ‘n cut of meat wat ek graag wil gebruik…

Wat is die een dis wat jou vriende of familie telkemale voor vra en jy oor en oor moet maak?

Roomys is hul nuutste gier.

Watter drie bekende mense sal jy vir aandete nooi en hoekom?

Jacob Zuma, omdat ek soos alle Suid Afrikaners baie vrae het. Die res sal ek mooi oor moet dink. Daar is so baie talentvolle ontwerpers wat ek op Instagram volg dat ek eers ’n kortlys sal moet maak.

Wat sal op die spyskaart wees?

Droë brood en water vir Zuma, die res kry filet en kaviaar!

Watter een bestanddeel kikker vir jou enige maal op?

Dit sal twee moet wees: sout en suiker! Ek dink baie mense kyk dit mis as hulle kook en dan is hul dis nie gebalanseer nie.

Wat is jou doodsonde met kos?

Simba-skyfies en Lindt-sjokolade.

LEES OOK:Sjef Gina Marziani

Wat is jou een geheim vir ’n lekker braai of somer-ete op die stoep?

My suster! Sy is die braaikoningin! Ek raak nie aan ’n rooster nie.

Wat is jou gunstelingwyn en met watter dis drink jy dit graag?

Ek is nie ’n groot drinker nie. Maar ’n ligte wittetjie voor ete is altyd gaaf!

Watter wenk het jy vir tuiskokke om hul kookkuns te transformeer?

Aanhouer wen. Practice makes perfect.

Watter kosreuke herinner jou aan jou kinderdae?

Suurdeegbrood.

Watter kombuisgereedskap het jou lewe verander?

Skerp messe!

Onthaal jy graag en indien wel, wat maak jy graag vir vriende?

Ek het ongelukkig te min tyd om te onthaal, so meeste vriende kom kuier maar by die restaurant.

As jy ’n drankie kon wees, wat sou jy wees?

G&T, want dit is veelsydig en ietwat ekstrovert.

Watter kookboek het jou al die meeste in jou loopbaan beïnvloed?

Ek probeer so min moontlik kookboeke lees, want dis gewoonlik baie eendimensioneel. Ek kyk eerder na die kosseksies van tydskrifte, want dit hou jou op hoogte van neigings.

LEES OOK: Sjefs: Henry Vigar

As jy nie as ’n sjef kwalifiseer het nie, watter ander beroep sou jy kon volg?

Argitektuur, ek is mal oor die diversiteit van argitektuur.

Wie is jou koshelde?

Maranda Engelbrecht. Ek het vir haar gewerk by Manna Epicure en wat daardie vrou met kos kan doen, is eksoties!

Watter is jou gunstelingkrui?

Pietersielie

As jy een dis moet uitsonder wat jy glo jou kookstyl verteenwoordig, wat sal dit wees?

Ek herhaal bitter min ’n dis op my spyskaarte. Maar as ’n styl probeer ek nie my disse te gekompliseerd maak nie. Elke element op die bord moet herkenbaar wees.

Wat is die mooiste woorde wat jy al om kos gehoor het?

Dankie! Ons vergeet te vinnig dat daar iemand agter kospotte staan om jou dag merkwaardig te maak, iemand wat volgens die bedryfscliché nie ’n lewe het nie! Dank is een van die sterkste woorde vir my.

Bespreek by 023-231-0002.

Francois se Pampoenkoekies met ’n tiemie-botterkaramelsous

Bestanddele:

500 g botterskorsie, saggekook

1 ½ koppie bruismeel

Olie vir braai, ongeveer 5 cm diep

½ koppie witsuiker

2 koppies room

1 eetlepel gekapte tiemie

Metode:

Maak die botterskorsie goed fyn en sif die meel by. Meng tot ’n sagte deeg.

Verhit die olie tot 200 grade C en draai dan af na 150 grade waarin jy groot bolle deeg skep. As jou olie te warm is, sal die poffertjies nog rou wees binne en as die olie te koud is, sal hulle nie behoorlik uitrys nie. Toets een voor jy die ander beslag inskep.

Moenie meer as 5-8 poffertjies op ’n keer braai nie, want hulle vergroot vinnig in die warm olie. Laat vir ongeveer 5-7 minute in die olie bak.

Vir die sous:

Meng die suiker met water in ’n kleefvrye pan en verhit die pan tot die suiker opgelos het. Laat dit kook tot dit goudbruin verkleur en draai die pan in die rondte dat die sous eweredig verbruin, sonder om te brand.

Draai die hitte laer en voeg die room stadig by. Die karamel sal verhard, maar sal weer loperig word as die room verhit is. Voeg die tiemie by en kook tot al die karamel opgelos is.

Verwyder van die hitte en laat effe verkoel voor dit met die poffertjies bedien word.

Die sous sal 2-3 weke in die yskas hou.

Sjef-Francois-du-Toit

 

Send this to a friend