Gina Marziani is die nuwe hoof-fyngebaksjef by die Twelve Apostles Hotel and Spa buite Kaapstad
Deur Maryke Roberts
Foto’s verskaf
Sy het by die Culinary Academy by Backsberg gekwalifiseer en het haar talent by verskeie voorste restaurante soos die Mount Nelson Hotel en Delaire Graff Landgoed se Indochine as sous-chef geslyp. ’n Ruk by die Velvet Cake Company het haar liefde vir bak laat ontvlam en sy vertel dat sy halsoorkop verlief geraak het op fyngebak.
Wat het jou laat besluit om eerder op fyngebak te fokus in jou sjefsloopbaan?
Ek het reeds gedurende my studies baie in fyngebak begin belangstel en om die magiese betowering van ’n perfekte Croquembouche te maak, bly vir my ’n hoogtepunt.
Waar gaan jy heen vir iets lekkers om te eet?
Jason’s Bakery in Breëstraat in Kaapstad is een van my gunstelingplekke, want sy vertolking van geure is ongelooflik.
Hoe sal jy jouself as sjef beskryf?
Ek hou daarvan om ’n bestaande resep aan te pas, so ek glo ek is avontuurlustig, maar in ’n gekontroleerde, beplande manier.
Is daar iets wat jy sover bereik het wat vir jou uitstaan?
Om deel te wees van die Unilever Sjef van die Jaar 2017 was ongelooflik. Dit was ook baie lekker om vir die eienaars van ons hotel, mnr. en mev. Tollman, te kon bak.
Wat is jou gunstelingfyngebak?
’n Pragtige suurlemoentert. Die beste een wat ek al geproe het, was by Ile de Pain in Knysna.
As jy iewers koffie gaan drink, wat bestel jy graag daarmee saam?
’n Lekker koekie. Jy kan nie verkeerd gaan met ’n lekker krakerige koekie wat lank kou nie.
Wat is die beste kosgesegde wat jy al gehoor het?
“Life is uncertain. Eat dessert first.” deur Ernestine Ulmer
Watter bestanddele is vir jou belangrik en altyd in jou spens?
Vanielje, meel, suiker, botter, eiers en suurlemoene.
Wat is tans jou gunstelingrestaurant?
Indochine Restaurant by Delaire Graff Landgoed buite Stellenbosch is my top-plek vir ’n spesiale eet-ervaring.
LEES OOK: Sjefs: Jan Hendrik van der Westhuizen
Wat het jou opgeval doen tuiskokke dikwels verkeerd as hulle bak?
Hulle meng die bestanddele te veel. Jy moet dit net goed meng, nie te lank nie.
Wat is jou een geheim vir ’n suksesvolle bak-ervaring?
’n Ligte hand met deeg. Dit gaan jou ver bring met delikate fyngebak.
Wat is jou gunstelingdrankie?
Goeie, vars gebroude koffie.
Wat is jou sjefsleuse?
“One dream, one team.”
Het jy ’n gunstelingkookboek wat jy baie gebruik?
Patisserie at Home deur Will Torrent.
Wat kan tuisbakkers in hul kas hou om iets vinnig-vinnig te bak?
Jy kan enigiets maak met meel, suiker en eiers.
Na watter sjefs kyk jy op?
Plaaslik is dit Rudi Liebenberg van die Mount Nelson, sowel as my uitvoerende sjef by die Twelve Apostles Hotel and Spa. Beide is ongelooflike sjefs en baie inspirerend. Internasionaal sal dit Raymond Blanc wees. Hy het by sy ma en ouma geleer en homself die fynere kunsies geleer.
Wie het jou al die beste kookraad gegee?
Vicky Gurovich van die Mount Nelson Hotel het my die ware vreugde van sjokolade geleer. Dis ’n pragtige en aardse bestanddeel.
Gina se resep vir wit sjokolade en Macadamia Blondie (witsjokoladebruintjie)
Bestanddele
7 eiers
420 g strooisuiker
400 g botter
250 g witsjokolade
200 g gesifte koekmeel
270 g grofgekapte Macadamianeute
Metode
Voer ’n bakplaat met silikoonpapier uit. Voorverhit die oond tot 180 °C.
Sit ’n pot met kookwater op die stoof of as jy ’n dubbelkoker het, gebruik dit. In ’n hittebestande bak, voeg die botter en sjokolade by en smelt oor die kookwater.
Breek die eiers en strooisuiker in ’n aparte bak en meng deeglik. Voeg die gesmelte botter en sjokolademengsel stadig by en voeg dan die gesifte meel by. Vou deeglik in en strooi die neute by.
Gooi die mengsel in die bakplaat en versprei eweredig. Bak vir ongeveer 20 minute tot goudbruin en die mengsel goed gestol het. Wanneer dit gebak het, laat buite die oond afkoel en sny dan in vierkante.
Roomkaasmousse om die Blondie mee te versier:
Bestanddele
150 g roomkaas
15 ml versiersuiker
1 vanieljepeul
Sap en vesel van een lemmetjie
Metode
Meng die roomkaas, versiersuiker en vanieljesaadjies in ’n mengbak tot glad. Voeg laastens die lemmetjie by. Skep die mengsel in ’n sak en druk klein hoeveelhede op elke bruintjie. Besprinkel met ekstra versiersuiker en fyn gerasperde lemmetjieskil. Bedien en geniet!
