Die jongmense van die vernuwende groep Afrikaans Herlaai gesels met Christiaan J de Swardt oor hul erfenis

CHRISTIAAN J DE SWARDT

Vier trotse Afrikaanse jongmense, Carlyn Fransman, Dehan von Solms, Eunice Kemp en Whaden Johannes, het as die vernuwende groep Afrikaans Herlaai vanjaar drie Ghoema-benoemings ingepalm vir hul debuutalbum Hier kom ? ding.

Almal is positief oor die voortbestaan van Afrikaans – want “dit word gepraat’!

Hulle gesels wortels én Afrikaans.

Carlyn Fransman

My bynaam: Al my wit vriende noem my bruinbroodjie! Mense noem my gewoonlik Carla, Karretjies, Katryntjie, Karlien of Carl.

My gesin: My pa, Ludwich, is ‘n jack of all trades, maar hy doen nou koerierwerk. Moeder Shirley is ‘n onderwyseres al vir te veel jare. My suster, Lauren, is ook ‘n onnie vir die kleintjies. Sy is getroud en het haar eie drie kids. My broer is getroud, het twee dogtertjies, woon in Kuilsrivier en werk vir ‘n privaat maatskappy as ‘n projekbestuurder in verskillende laboratoriums.

My wortels: Om eerlik te wees, is my Afrikaanse musiekagtergrond nie so breed nie. Ek het feitlik nie regtig Afrikaans geluister nie. Ek het wel geweet van liedjies soos Sproetjies en Ek verlang na jou bestaan, maar in ons huis het ek met die Bee Gees en Lionel Richie grootgeword.

Dehan von Solms

My bynaam: Op skool het my mede-rugbyspelers my onder die naam Jimi geroep, ‘n verkorting vir Jimi Hendrix.

My gesin: My pa, Dewald, is ‘n operasanger, my ma, Karien, is ‘n fotograaf en my sussie, Karla, ‘n leerder.

My wortels: My ouers en hul voorouers is suiwer Afrikaans. Danksy my pa se beroep het ek op die musiekverhoog grootgeword.

Eunice Kemp

My bynaam: Niecie.

My gesin: My pa, Philip, is al 21 jaar lank ‘n Afrikaans-onderwyser en ‘n private krieket-afrigter. My ma, Reniece, werk by die Phonak-oorinstituut. My broer, Maurice, werk by die Sediba Kwele Lodge buite Brits.

My wortels: Ek het in ‘n Afrikaanse huis grootgeword. Ek was in Hoërskool Wonderboom en in Laerskool Voorpos – waar my pa my Afrikaans-onderwyser was.

Whaden Johannes

My bynaam: Boesman! Oor ek glo dis my oorspronklike bloedlyn.

My gesin: Ek is as Adams gebore. My ouers is nie meer saam nie. My ma, Alexandra, is ‘n voltydse huisvrou. My pa, Noël, is ‘n area-bestuurder vir ‘n drankmaatskappy. Ons is ? klomp kinders: ek, my boeties, Vaughn en Zandré, en my sussies, Tercia en Tylah. Hulle is almal baie loving. My boeties en jongste sussie love musiek. Albei my boeties speel kitaar en my jongste sussie is mal oor ballet en drama.

My wortels: Ek het Afrikaans grootgeword. Ek is steeds Afrikaans en die meeste van my werk wat ek doen, is in Afrikaans.

Wat is vir jou die vyf lekkerste/mooiste Afrikaanse woorde?

Carlyn:

Idillies

Mallemeule

Pekanneut

Vroetel

Broekhoesie

Dehan:

Poenankies

Norretjiepatat

Nurk

Wandelpad

Karmosyn

Eunice:

Liefde

Inspirasie

Hoop

Blymoedig

Geloof

Whaden:

Kief

Lekker

Sproetjies

Afgemaai

Liefde

En wat is die krasste of lelikste woorde?

Carlyn: Brabbeltaal, snuif, (ge)neuk, lastertaal en vloekwoorde!

Dehan: Dobbel, snor en googleloer,

Eunice: Alle kragtaal en vloekwoorde!

Whaden: Dis nie die taal wat woorde lelik maak nie; dis die mense wat dit gebruik, soos die taal wat in ‘n kroeg gespoeg word – en nie hier genoem durf word nie!