Die Odeion-strykkwartet: Samson Diamond, Jeanne-Louise Moolman, Anmarie van der Westhuizen en Sharon de Kock
Die Odeion-strykkwartet is die resident-kwartet verbonde aan die Universiteit van die Vrystaat
Deur JOHAN MYBURG
Die immer opwindende Bloemfonteinse Odeion-strykkwartet is volgende maand in Johannesburg vir ’n uitvoering vir die Johannesburgse Musiekvereniging (JMS) in die Linder-ouditorium in Parktown. Dié viertal – Samson Diamond (viool), Sharon de Kock (viool), Jeanne-Louise Moolman (altviool) en Anmarie van der Westhuizen (tjello) – het nie net in Suid- Afrika aansien vir hul hegte ensemblespel verwerf nie, maar ook in die buiteland. Die Odeion-strykkwartet, die enigste residentkwartet verbonde aan ’n universiteit in Suid-Afrika, het in 1991 tot stand gekom en deur die jare het lede vertrek en nuwes bygekom.
Die eerste lede van die kwartet was Derek Ochse, Abrie de Wet, John Wille en Michael Haller. Ná Ochse se aftrede het Juan Muñoz as leier oorgeneem en ’n paar jaar later Jürgen Schwietering. In 2007 het Schwietering en De Wet bedank en Wille en Haller het kort daarna afgetree. Dit was die geleentheid om die kwartet opnuut saam te stel en vier vroue, De Kock, Moolman, Van der Westhuizen en Denise Sutton, is aangestel. Diamond het in 2013 in die plek van Sutton by die kwartet aangesluit. Ondernemend soos die Odeionstrykkwartet is, het hulle in 2016 saam met Guy Buttery op die Nasionale Kunstefees in Makhanda opgetree, en verlede jaar was die kwartet by die produksie Seven Last Words betrokke, ’n uitvoering van dié werk van Joseph Haydn onder leiding van Richard Cock saam met die Chanticleer Singers.
In Coenie de Villiers se jongste CD is ’n snit met die Odeion se vertolking van The Dinner ingesluit. Onder die kunstenaars met wie die kwartet al in die verlede saamgespan het, is Albie van Schalkwyk, Ben Schoeman, Catherine Foxcroft, Eddy van Oosthuyse, Farida Bacharova, James Grace, Leon Bosch, Leslie Howard, Liesl Stoltz, Marian Lewin en Zanta Hofmeyr. In 2011 het die kwartet ’n opname van Hendrik Hofmeyr se Strykkwartet no. 1 en no. 2 gemaak. Vir die Linder-konsert snoer die Odeionkwartet kragte saam met die pianis Amit Yahav wat in Amsterdam grootgeword het en aan die Royal College of Music in Londen onder andere onder twee Suid-Afrikaners, Niel Immelman en Yonty Solomon, studeer het.
LEES OOK: Klassieke klanke: 40 vingers
Vroeër vanjaar het hy sy doktorsgraad verwerf met ’n ondersoek na interpretasiemoontlikhede van die musiek van Frédéric Chopin. Chopin is dan ook die een komponis van wie werk uitgevoer word – Bartlomiej Kominek se verwerking van sy Klavierkonsert in f, op. 21 vir klavier en strykkwartet. Op. 21 is in 1829 geskryf toe Chopin 20 was. Hoewel die werk as No. 2 gepubliseer is, was dit Chopin se eerste konsert vir klavier, geskryf pas ná sy formele musiekopleiding. Die ander werk op die program is die Kwintet no. 2 in A, op. 81 van Antonin Dvorák.
Dié kwintet is in 1887 geskryf en word as een van die meesterstukke in dié genre gereken, saam met dié van Robert Schumann, Johannes Brahms en Dmitri Sjostakowitsj. Yahav het in 2014 die CD Amit Yahav Plays Chopin uitgereik, ’n opname met die vier Ballades, twee Polonaises en die Scherzo in c-kruis, op. 39. In sy loopbaan het Yahav verskeie pryse in klavierkompetisies verower. Hy was ook die wenner van die eerste internasionale Israelse musiekkompetisie in Londen. Bespreek vir die konsert op 20 Oktober by Computicket. Kaartjies (slegs kontant) is ook een uur voor die aanvang van die konsert by die Linder beskikbaar Vir meer inligting oor JMS, besoek www.jms.org.za
