Die Gautengse sjef Chantel Dartnall van Restaurant Mosaic in The Orient Boutique Hotel in Elandsfontein, het die Eat Out-toekenning as 2015 se Sjef van die Jaar ontvang. Chantel het ook die titel as sjef van die jaar in 2009 ingepalm en vanjaar spog Mosaic ook as een van die top-5-restaurante in die land.
Maryke Roberts
Chantel Dartnall het ná skool by die Prue Leith College of Food and Wine in Centurion (nou die Prue Leith Chef’s Academy) studeer. Nadat sy haar studies voltooi het, het die bekende Britste sjef, Nico Ladenis, haar ’n pos as commis-sjef in sy restaurant, Chez Nico in Park Lane, Londen, aangebied. Dit was ’n groot deurbraak, want in daardie stadium was hy een van slegs twee Britse sjefs wat met drie Michelin-sterre kon spog. Sy het ook saam met Michael Caines van Gidleigh Park in Devon gewerk en reis gereeld oorsee om op hoogte van nuwe internasionale neigings te bly.
Die dis wat sy vir die aand berei het, het sy “skatte op die strand” genoem en het onder meer groot garnaalsterte en rooibos in ’n tamatierisotto ingesluit.
Terug by Mosaic is sy vol nuwe idees en het die somerspyskaart aangepas sodat haar gaste nog lekkerder kan eet.
Resep Hier’s haar resep vir rooibostamatietee-consomméjellie met ‘n kruievinaigrette
• Bespreek by Restaurant Mosaic by 012 371 2902/3/4/5, e-pos [email protected] of besoek www.restaurantmosaic.com
Beskryf jou kookstyl in drie woorde:
Passievol, vroulik en botanies.
Wat is trooskos vir jou en hoekom?
Romerige sampioenpasta. Sampioene is van my gunstelingbestanddele en laat my sommer dadelik beter voel. En ook my ma se geroosterde hoender. Sy gebruik baie suurlemoen en baie speserye. Terwyl ek in Londen gewerk het, het ek daarna verlang. Dit bring veiligheid as jy tuis is en sy dit vir jou kan kook.
As jou huis afbrand, wat sou jy red?
My twee katte, Peanuts en Ogies. En seker ook my oupa se paletmessie wat hy gebruik het as hy koeke versier het. Hy was ’n fyngebaksjef vir die koninklike familie in Engeland in die 1900’s. Ek is mal oor die antieke karakter daarvan.
Grootste kombuisflater ooit?
Ek is totaal gemaklik in die kombuis, want my passie neem oor. Maar ek het een maal, lank lank gelede, probeer om rys in die mikrogolfoond te kook. Dit was steenkool. Sedertdien is daar geen kortpaaie meer in my kombuis nie!
Is jou vriende skrikkerig om jou vir ete oor te nooi?
Almal weet hoe mal ek oor kos is en ek glo enigiets wat met liefde en in die gees van deel gemaak word, is fantasties.
Wat is jou terugvaldis as jy vinnig iets moet kook?
Oosterse groenteroerbraai.
Wat is jou een geheim vir ’n lekker braai?
Gebruik altyd regte hardekoolhout – dit gee ’n baie beter smaak aan jou vleis.
Wie inspireer jou?
Die vader van botaniese kookkuns, Michel Bras. Sy restaurant is op die Aubrac-plato in Laguiole, Frankryk, ongeveer vier ure vanaf Parys. Letterlik in die middel van nêrens. Een slaai sal bestaan uit 29 groente. Jy kan voel hoe begin jou lyf gloei as jou bord leeggeëet is!
Jou een groot fantasie-gas en wat sal jy vir dié gas kook?
August Escoffier. Hy het souse gerevolusioneer, van béchamel tot Hollandaise, deur hulle volgens bestanddele te klassifiseer. Ek is mal oor goeie souse, dit kan ’n dis maak of breek. Ek sal vir hom my Franse bouillabaisse maak. Dis die basiese resep, maar ek het dit aangepas met kreef en vars bottersous waarin ek lemoen roer. Die sitrus lig die hele sous en maak dit ligter op die tong. Ek sal dit met die Elsassiese Riesling bedien.
Wat was die romantiese maal wat jy nog geniet het?
Dit was in Florence, Italië, by Entoca Pinchiorri; dit was net die perfekte aand.
Is daar een dis wat jou vriende of familie telkemale voor vra en jy oor en oor moet maak?
My kreefstert-bisque gegeur met ’n bietjie saffraan en steranys.
Vyf bestanddele wat altyd in jou koskas is?
Botter, aarbeie, room, sampioene, vars kruie en ek moet suurlemoene byvoeg!
Een kookwenk vir lesers?
Hou dit eenvoudig, moenie dinge te veel oordink nie.
Watter krui of spesery gebruik jy die graagste in jou kos en watter krui dink jy kry nie genoeg aandag in Suid-Afrikaners se kombuise nie?
Ek is baie lief vir suurlemoenverbena (lemon verbena) – dit is wonderlik om in drankies, nageregte of ligte roomsouse saam met vis te gebruik.
Wat is jou lewensleuse?
Leef elke dag asof dit jou laaste dag is.
Watter een bestanddeel kikker vir jou enige maal op?
Die een bestanddeel wat my mond elke keer laat water as ek dit ruik, is die baie eksotiese tonkasaad – dit kan baie suksesvol saam met soet en sout geregte gebruik word. Dit is fantasties.
