“Die meeste mense is omtrent so gelukkig as wat hulle besluit om te wees” – Abraham Lincoln
Ons wil almal graag gelukkig wees, maar presies wat is geluk? Word ons daarmee gebore of is dit iets wat ons vir onsself skep? In sy boek Happiness: Unlocking the Mysteries of Psychological Wealth, skryf die sielkundeprofessor Ed Diener dat geluk ‘n kombinasie van lewensbevrediging en positiewer as negatiewe emosies is.
Hy het ook in ‘n studie bevind dat gelukkige mense langer leef en beter gesondheid ondervind as mense wat ongelukkig is.
Volgens die navorser en skrywer van Authentic Happiness, dr Martin Seligman, bestaan geluk uit drie dele naamlik plesier, betrokkenheid en betekenis.
Plesier is die “voel goed”-deel van geluk. Betrokkenheid verwys na ‘n goeie lewe ten opsigte van werk, familie, vriende en stokperdjies. Betekenis verwys na hoe ons ons sterk punte gebruik om tot ‘n groter doel by te dra. Volgens Seligman is al drie belangrik, maar dat betrokkenheid en betekenis die grootste bydrae tot ‘n gelukkige lewe lewer.
Prof Richard Wiseman is ‘n sielkundige aan die Universiteit van Hertfordshire en het in ‘n navorsingsprojek wat tien jaar geneem het om te voltooi, bevind dat mense tot ‘n groot mate vir hul eie goeie en slegte “geluk” verantwoordelik is.
Volgens Richard skep mense hul eie goeie geluk via vier basiese beginsels:
- Hulle ontwikkel hul vaardighede om geleenthede te skep en raak te sien.
- Hulle neem goeie besluite deur na hul intuïsie te luister.
- Hulle het positiewe verwagtinge.
- Hulle neem ‘n veerkragtige houding aan wat “slegte geluk” in “goeie geluk” omskep.
Vir addisionele bronne klik hier en hier.
