Vir sy program in Johannesburg sluit Ben Schoeman die werk van Kodály, Tsjaikofski en Rachmaninoff in – werke met besonderse klankkleurmoontlikhede asook melodiese prag
Deur JOHAN MYBURG
Ben Schoeman, die Suid-Afrikaanse konsertpianis wat ‘n geruime tyd al in Londen woon, is op 8 Junie in die Linder-ouditorium, waar hy ‘n uitvoering vir die Johannesburg Musiekvereniging (JMV) sal gee. Ben het in 2016 sy doktorsgraad in musiek aan die City, University of London en die Guildhall School of Music and Drama verwerf.
Schoeman is nietemin geen vreemdeling in Suid-Afrika nie, soveel te meer sedert hy ‘n pos as senior lektor aan die Universiteit van Pretoria, sy alma mater, aanvaar het met dien verstande dat hy sy internasionale konsertloopbaan kan voortsit terwyl studente terselfdertyd uit sy kennis en ervaring kan put.
“Dit is opwindend om met jong talent te werk en ek voel dat ek my eie repertorium in die proses vergroot,” sê Schoeman. “In Londen berei ek meestal vir konserte voor en gee aandag aan die musikologiese aspek van my werk (studieleiding en publikasie van artikels). “Die internasionale aard van my beroep is soms uitputtend, maar beslis voordelig, aangesien dit my inspireer en ook die impak wat ek as dosent kan maak, vergroot.”Van Londen kan hy ook makliker vir konserte na Europa reis, onder meer met sy duo-speler, die tjellis Anzél Gerber, wat in Wene woon.
In Londen werk hy al die afgelope tien jaar saam met Tessa Uys en vir die Beethoven-jaar wat volgende jaar gevier word (250 jaar ná die geboorte van dié komponis) beplan dié twee onder meer om die Scharwenka-transkripsies van Beethoven se nege simfonieë klaar op te neem en op CD uit te reik. Die onderwerp van sy doktorale tesis was “The Piano Works of Stefans Grové (1922-2014): A Study of Stylistic Influences, Technical Elements and Canon Formation in South African Art Music”, en hy is op die oomblik besig om die volledige klavierwerke van Grové op te neem.“Dit is ‘n uitdagende projek,” sê hy, “want sy werke is tegnies baie moeilik.”
Hy werk boonop ook aan die voorbereiding vir premières van verskeie ander kontemporêre komponiste se musiek. “Ek werk graag met die nuwe generasie komponiste in ons land, maar ook in Brittanje.” Sy program vir die MJV bestaan uit die Busoni-verwerking van JS Bach se Ich ruf zu Dir, Herr Jesu Christ (BV B 27/5); Robert Schumann se Kreisleriana, op. 16; Zoltán Kodály se Dances of Marosszék; Pjotr Iljitsj Tsjaikofski se Konsertsuite uit Die neutkraker (transkripsie van Mikhail Pletnev); en Sergei Rachmaninoff se Sonate no. 2 in b-mol, op. 36.
Dit is ‘n opwindende program met benewens twee Duitse komponiste om mee te begin ook Russiese en Hongaarse musiek. “Ek vind die folkloristiese aspekte veral fassinerend en die werke van Kodály, Tsjaikofski en Rachmaninoff sluit almal besonderse klankkleurmoontlikhede, asook melodiese prag in,” sê Schoeman. Op hierdie besoek tree Schoeman net in dié een konsert in die Linder op, maar van 19 tot 25 Julie is hy op die beoordelaarspaneel vir Unisa se Nasionale Klavierkompetisie. Van 10 tot 17 Augustus bied hy openbare meesterklasse tydens die musiekfees by die Universiteit van Pretoria aan. Op dié fees lewer hy ook ‘n lesingdemonstrasie oor Grové se musiek.
Op 18 Augustus gee hy ‘n uitvoering in die Brooklyn-teater in Pretoria, en in Oktober tree hy saam met Danré Strydom (klarinet) en Anmari van der Westhuizen (tjello) in ‘n trio-program in die Odeion in Bloemfontein op. Daar is onder meer werke van Brahms en Glinka op dié program.
Besoek www.jms.org.za.
