Rangwanasha is in die tweede ronde van die kompetisie vir haar vertolking van ’n Suid-Afrikaanse werk beloon – die melancholiese ‘Mali, die slaaf se lied’ van S le Roux Marais
Deur JOHAN MYBURG
Cecilia Rangwanasha, ’n sopraan in Kaapstad Opera se Studio-opleidingsprogram, is in September as die wenner van die sewende ATKV Muziqanto-prys aangewys. Boonop is die naaswenner, die sopraan Frances du Plessis, sowel as die bariton Owen Metsileng wat derde geëindig het, ook aan Kaapstad Opera se Studio verbonde.
Die Studio-program strek oor twee jaar en is daarop ingestel om gegradueerde sangers se tegniek en verhoogvaardighede te slyp voordat hulle ’n professionele loopbaan begin. Die ATKV Muziqanto-kompetisie vir Suid-Afrikaanse sangers tussen 18 en 32 word jaarliks aangebied en die algehele wenner kry R50 000. Vanjaar het die beoordelaars die Suid- Afrikaanse sopraan Sibongile Mngoma, die Suid-Afrikaanse bariton Fikile Mvinjelwa en die Amerikaans gebore sopraan Eugenie Chopin, wat jare lank al in Suid-Afrika woon, ingesluit.
Aspekte wat by die beoordeling ter sprake kom, sluit stemkwaliteit en intonasie; asembeheer, artikulasie en algemene tegniese vaardigheid; diksie en korrekte uitspraak; frasering en stylgetrouheid; dinamiese afwisseling en toonkleur; teksbegrip en vertolking; staanposisie, kommunikasie en aanbieding en die bemeestering van die gekose repertoire in. Die eerste ronde van die kompetisie vind gewoonlik in Mei in verskillende plekke in die land plaas. Tien kandidate dring na die tweede ronde deur en uit dié tien word vyf aangewys om saam met ’n simfonie-orkes by die finale beoordeling op te tree.
LEES OOK: klassieke klanke: Pumeza Matshikiza
Vir dié geleentheid moet die kandidate uit ’n omvangryke lys arias, lieder, resitatiewe en ander werk vir die stem kies – van Mahler tot Khumalo en van Bach tot Wagner. As algehele wenner het Rangwanasha (23) wat tans met ’n nagraadse diploma aan die Universiteit van Kaapstad onder leiding van Virginia Davids besig is, prysgeld ter waarde van R50 000 ontvang. In die eindronde was dit met haar weergawe van My Man’s Gone Now uit George Gershwin se Porgy and Bess en die aria Pace, pace mio Dio! uit La forza del destino van Giuseppe Verdi waarmee sy die beoordelaars beïndruk het.
Sy het in die tweede ronde van die kompetisie ’n verdere R6 000 vir die beste vertolking van ’n Suid-Afrikaanse werk verower – die melancholiese Mali, die slaaf se lied van S le Roux Marais. Rangwanasha kom van Lebowakgomo in Limpopo waar sy as hoërskoolleerder in die skool- en kerkkoor gesing het. Met die aanmoediging van haar ma, ’n enkelouer, het sy ná skool musiek aan die Tshwane- Universiteit van Tegnologie (TUT) gaan studeer en ’n BTech in stemkuns met lof behaal. Tydens haar studie aan TUT het sy in verskeie studenteproduksies opgetree, onder meer Faust (2013), La Cenerentola (2014) en Falstaff (2015) en meesterklasse bygewoon wat Michelle Breedt en Josef Protschka kom aanbied het. In 2015 het sy die halfeindronde in die Mimi Coertse-sangkompetisie gehaal.
Die volgende jaar het sy die eerste plek in die Phillip H Moore-musiekkompetisie behaal en is ook as die beste vertolker van ’n Suid-Afrikaanse kunslied in die ATKV Muziqanto aangewys. Dit was haar vertolking van Isithwanda Sam deur BPJ Tyamzashe wat haar dié onderskeiding besorg het. Hoewel sy ’n hele rits suksesse besonder vroeg in haar loopbaan behaal het, is Rangwanasha nie onkundig oor die uitdagings van ’n sangloopbaan nie. Die een ding wat sy vroeg al geleer het, is dat die bedryf mededingend is. “Musiek is nie ’n maklike onderneming nie en ’n mens kan net slaag as jy volledig toegewyd is,” het sy by geleentheid opgemerk.
