Drie van die vissermanne wat deel is van die projek en baanbrekerswerk daarmee verrig het, is van links Nico Waldeck, David Shoshola en Wilfred Consalves.
Die reis en storie van elke vis word letterlik gevolg vanaf die vishoek in die water gegooi is, tot die vis in jou kombuis lê
Deur MARYKE ROBERTS
Foto’s Clifford Roberts
Steenberg Landgoed se Bistro Sixteen82 en ABALOBI, ’n gemeenskap-gedrewe inisiatief sonder winsbejag, het onlangs Suid-Afrika se heel eerste restaurant-ondersteunde vissery van stapel gestuur vir die verskaffing van volhoubare en naspeurbare topgehalte seekos, gevang deur kleinskaalse, plaaslike vissers. Die geleentheid is met ’n middagete by Steenberg Landgoed gevier en van die vissers wat baat by hierdie projek, was daar om met gaste te gesels.
Die kern van hierdie baanbreker-proefprojek is die verkryging van seekos wat ekologies verantwoordelik en sosiaal regverdig is. Die vennootskap tussen tradisionele vissers, ABALOBI (www.abalobi.info), WWF-Southern African Sustainable Seafood Initiative (wwfsassi.co.za/) en Bistro Sixteen82, verskaf aan vissers aan die Kaapse wes- en suidkus, ’n beter prys vir hul vis en lewensbestaan vir hul gesin. Die direkte roete vanaf boot na bord verseker volhoubaarheid vir die vissergemeenskap asook die visbronne.
“Hierdie vennootskap is ongelooflik innoverend en opwindend. Buiten die bemagtiging van vissers om ’n beter prys te bekom en die bewusmaking onder verbruikers oor wie hul vis gevang het, is ons ook besig om die weg te baan vir ’n regverdiger, meer volhoubare voedselsisteem,” sê Dr. Serge Raemaekers, medestigter en projekdirekteur van ABALOBI, die isiXhosa woord vir kleinskaalse visser.
Al die vis wat deur hierdie kleinskaalse vissers gevang word, is heeltemal naspeurbaar deur die gebruik van ’n mobiele toepassing wat jy met jou slimfoon kan gebruik. Die reis en storie van elke vis word letterlik gevolg vanaf die vishoek in die water gegooi is, tot die vis in jou kombuis lê. Vyf noukeurige mede-ontwerpte toepassings vorm deel van die From Hook to Cook-stelsel, wat die bestuur en bemarking van vis en ander seebronne met ’n ekologiese en sosiale “storie” moontlik maak op ’n manier, wat heeltemal naspeurbaar is.
Met hierdie toepassing is dit nou moontlik om meer oor die “vangs van die dag” op jou bord te leer, en direk na te spoor hoe, waar en deur watter plaaslike visser dit gevang is. Dit is waaroor “seekos met ‘n storie” gaan.
“In ons restaurant kan jy verantwoordelike, naspeurbare vis, gevang deur plaaslike kleinskaalse vissers bestel en geniet. Die vis word direk vanaf hul bote na ons kombuis afgelewer,” sê ABALOBI ambassadeur, sjef Kerry Kilpin van Bistro Sixteen82, waar gaste ‘n QR-kode by hul tafel kan skandeer om die hele verhaal van die vis op hul bord te ontdek.
Sjef Kerry werk direk met die vissers – mans en vrouens – betrokke by die ABALOBI-inisiatief, wat haar van hul daaglikse vangs voorsien. Hierdie soms minder bekende, onderskatte vissoorte soos die Kaapse Galjoen (Pachymetopon blochii), is ryk aan geur met ’n laer impak op die omgewing.
David Shoshola is die dryfkrag agter die ABALOBI projek in die Lambertsbaaise vissergemeenskap. As ‘n plaaslike kleinskaalse visser was hy ongelooflik behulpsaam in die mede-ontwikkeling van die ABALOBI app. Hy was ook die eerste visser om die From Hook to Cook-inisiatief op die proef te stel. Hy het lekker saam met gaste gekuier en van sy persoonlilke ervarings met die toepassing en inisiatief gedeel. Saam met hom was Nico Waldeck en Wilfred Consalves, ook vissermanne van Lambertsbaai.
Vir meer inligting oor ABALOBI, besoek www.abalobi.org, www.facebook.com/abalobi.org of volg @abalobi_app op Twitter en Instagram.
Maryke is ’n ervare joernalis, wat haar liefde vir reis, mense, boeke, teater en lekker kos en wyn, op hierdie manier kan uitleef. Sy was al op elke uithoek van die aardbol – bo die wolke; in ’n lugballon; onder die water in ’n duikboot en onder die grond in tonnels – en gaan nêrens sonder haar reisgenoot, eggenoot en mede-joernalis, Clifford nie. Sy glo die lewe is te kort vir slegte koffie.
