Pretoria het op 7 April sy eerste Secret Sunrise by die Menlyn Park-winkelsentrum gehou. Die venue is aanvanklik geheim gehou en eers twee dae voor die gebeurtenis bekend gemaak.
By hul aankoms op die dak van die Menlyn Park-winkelsentrum is draadlose oorfone aan besoekers gegee. Daarna kon hulle deelneem aan ‘n interaktiewe danssessie wat joga, meditasie en dans ingesluit het. Die mense kon, terwyl hulle dans, sien hoe Pretoria wakker word en die asemrowende sonsopkoms bewonder.
So ‘n vroegoggendsessie bied die ideale geleentheid om mense bymekaar te bring en gemeenskapsgees te bou. “Sunrisers” sing, dans, stamp hulle voete en gee mekaar drukkies. Mense geniet dit om in ‘n veilige ruimte vrylik uiting te gee aan hul emosies. “Menlyn Park-winkelsentrum was nog altyd ‘n plek waar al die vlakke van die samelewing mekaar kan ontmoet en waar ‘n wye verskeidenheid kos, modes en vermaak dwarsdeur die jaar aangebied word,” sê Andrea de Wit, bemarkingsbestuurder van die Menlyn Park-winkelsentrum. Volgens Andrea was die Secret Sunrise-gebeurtenis “net nóg ‘n uitsonderlike geleentheid wat Menlyn aangebied het.”
Cheryl Hudson, mede-organiseerder van Secret Sunrise Johannesburg, sê dis ‘n wonderlike manier om die dag te begin en jou stad se pragtige, nuwe ruimtes te geniet. “Ons het sulke gebeurtenisse in Johannesburg aangebied en het wonderlike sonsopkomste op dakke, in parke en in die stad beleef,” sê sy. “As gevolg van die sukses wat ons met hierdie gebeurtenisse gehad het en die talle versoeke wat ons gekry het om meer daarvan te hou, is Pretoria gekies om deel van die groeiende beweging te word. En watter beter plek is daar om dit aan te bied as die moderne Menlyn Park-winkelsentrum’n”
“Secret Sunrise is ‘n goeie manier om uit jou gemaksone te beweeg, jou belaglik te gedra en deel te neem aan die pret waarby ons klante by Menlyn Park-winkelsentrum aanklank vind,” sê Andrea de Wit. Die eerste sessie is aangebied deur instrukteurs en die tema was The Bright Side. Al die deelnemers het ‘n poging aangewend om dit te weerspieël en in hul kleurrykste uitrustings opgedaag.
Secret Sunrise by Menlyn was ‘n groot sukses en almal het dit terdeë geniet.
