Zola Nene is die sjef en kosstilis op die televisieprogram Expresso. Haar sprankelende persoonlikheid laat jou lus kry vir kook, maak nie saak hoe vroeg in die oggend dit is nie.
Maryke Roberts
Haar eie koobkoek, Simply Delicious, het onlangs by Struik Lifestyle verskyn.
Sy vertel dat sy nooit ‘n oggendmens was nie, maar dat die program haar dwing om vroeg op te staan om voorbereidings te tref vir die dag se kos-insetsel. Nou het sy egter ‘n assistent en kan so ‘n klein bietjie later slaap.
Sy glo mieliepap is die een bestanddeel wat Suid-Afrikaners heeltemal onderskat, omdat ons dit bloot sien as pap of bykos. Maar sy het eindelose gebruike daarvoor en is veral mal daaroor om dit gaar te maak soos die Italianers met hul polenta maak: met baie parmesaan. Sy vervang die pasta in haar lasagne daarmee en deel haar resep hier onder.
Behalwe mieliepap, wat is jou ander gunstelingbestanddeel?
Ek is mal oor lam.
Wat is jou trooskos?
Lamskerrie – dit herinner my aan my huis, aan my ma se kookkuns en dit bring altyd troos.
As jy ‘n drankie kon wees, wat sou jy wees?
‘n Baie cool gin en tonic.
Met watter dis bederf jy jouself?
Ek is mal oor sampioenrisotto met ‘n skeutjie truffelolie (my broer het van sy reise af ‘n bottel truffelolie gebring en dis ‘n groot bederf).
Waar kom jou belangstelling in kos vandaan?
Ek het ná my regtestudies van twee jaar besef dat dit nie die loopbaan vir my is nie en besluit om myself eerder oorsee te gaan vind. Ek het vir twee jaar in Engeland gaan werk en omdat kosmaak nog altyd ‘n belangstelling was, het ek werk in professionele kombuise gesoek. Ek het in ‘n Brasserie in Cheshire gewerk – eers as warmkos-sjef en toe as hoof-fyngebaksjef. Die eerste dis wat ek moes maak, was ingewikkelde aartappels, maar die soussjef het my touwys gemaak.
Waar het jy geswot?
Met my terugkeer na Suid-Afrika, het ek by die Institute of Culinary Arts in Stellenbosch gaan studeer. Ná my studies het ek as kos-assistent by ‘n tydskrif gewerk en Johannesburg toe getrek om by ‘n groot spysenieringsmaatskappy te werk. Ek is sedert die begindae van Expresso die kosstilis en sjef en nou is ek sjef, en doen ook resep-ontwikkeling en kosstilering vir ‘n wye reeks publikasies en organisasies.
Hoe sal jy jou kookstyl beskryf?
Ontspanne en sonder fieterjasies.
Wat is die belangrikste bestanddeel vir ‘n goeie maaltyd?
Goeie geselskap en goeie wyn is die belangrikste bestanddele; daarna is die maal vanselsprekend goed.
Watter vyf bestanddele is altyd in jou koskas?
Pasta, rys, geblikte tamaties, mieliemeel (of polenta), gerookte paprika.
Enige oulike kortpaaie wat jy met lesers kan deel?
In plaas van ´n heel hoender in die oond bak, maak dit op die spit in die oond gaar. Dit verminder die kooktyd aansienlik en beteken jy kan gebraaide hoender sonder moeite in die middel van die week geniet!
Wat is jou gunsteling-kombuisgereedskap?
My Le Creuset-gietysterpotte.
Watter dis uit jou kinderdae is jou ná aan die hart?
Gestoomde mieliebrood wat my ouma (gogo) altyd vir my gemaak het. Sy het my geleer, maar as ek lus is daarvoor, draai ek my ma se arm as ek gaan kuier. Ek het my eie weergawe geskep (en deel die resep in my resepteboek). Dit is nie gestoom nie, maar smaak net so lekker soos my gogo s’n.
Watter raad het vir jou baie waarde?
Dié raad kom van my pa af: hy het gesê ek moet nooit iets doen wat my ongelukkig maak nie, want die lewe is te kort om onvervullende dinge te doen. Sy woorde is so waar en die rede dat ek ‘n loopbaan gekies het en volg waarvoor ek lief is. Dis ‘n uitvloeisel hiervan en ek is dankbaar daaroor.
Wat is jou kookmotto?
Kook is vir almal en my resepte is vir almal. Ek moedig mense aan om te probeer. Om wonderlike kos te kook, is nie so onmoontlik soos die meeste mense dink nie.
Jou gunsteling-kookboek?
Dit voel nogal weird om te sê my eie kookboek, maar ek is mal oor my boek. En ek is mal oor Jan-Hendrik van der Westhuizen se nuutste kookboek. Dis so pragtig!
Wat is tans jou gunsteling-restaurant?
Dis tussen twee: Foliage in Franchhoek en La Mouette in Seepunt.
Het jy enige rituele voor jy op die kassie gaan?
Nee, as jy my al ooit op die program gesien het, sal jy weet ek is altyd opgewek, nooit kalm nie. Ek kan myself net nie help nie!
Is daar enige televisieflops waarvan jy ons kan vertel?
Met lewendige uitsendings is daar maar altyd ruimte vir foute, maar ons ry die golf en maak die beste daarvan. Gelukkig het ek nou ‘n assistent wat my resepte ´n dag of so voor die uitsending toets – dit weer die grootste krisisse af.
Wat was tot dusver jou grootste kombuisflater?
Ek het nie groot floppe nie, maar het al meer neute en karamel gebrand as wat ek kan tel!
• Kry lus vir kook saam met Zola op SABC 3 se Expresso, weeksdae van 06:00 tot 08:30 en lees meer oor haar doen en late op haar webwerf, www.zolanene.com
Hier is Zola se resep vir pap lasagne uit haar eie kookboek, Simply Delicious. Sy noem dit haar weergawe van pap, sous en wors:
Bestanddele
30 ml olyfolie
1 fyngekapte ui
5 ml vinkelsade
500 gr varkmaalvleis
15 ml tamatiepasta
410 gr blikke gekapte tamaties
10 ml wit suiker
Sout en varsgemaalde swartpeper na smaak
800 ml groente-aftreksel
250 ml mieliemeel
125 ml gerasperde parmesaankaas, plus ekstra vir garnering
Metode
Verhit die olie en braai die uie en vinkelsade tot die ui sag is. Voeg die maalvleis by en braai tot goudbruin. Roer gereeld. Voeg die tamatiepasta, tamaties en suiker by en geur na smaak. Verlaag die hitte. Laat prut vir 15 minute, terwyl jy die pap berei.
Plaas die groente-aftreksel in ‘n pot en bring tot kookpunt. Sprinkel die mieliepap in die kokende aftreksel en roer voortdurend met ‘n houtlepel. Kook terwyl jy gereeld roer, vir 15–25 minute tot die pap dik en deurgekook is. Dit behoort van die kante weg te kom.
Verwyder van die hitte en roer die Pprmesaan in. Verhit die oond tot 200 °C en smeer ‘n oondvaste bak van 2 liter met botter of kleefsproei en versprei die helfte van die pap oor die bodem. Gooi die maalvleissous oor en versprei dan die ander helfte van die pap bo-op.
Sprinkel die parmesankaas oor en bak vir 20 minutes of tot die kaas goudbruin is.
SOURCES
Dawie Verwey
