Kuns: Die Turbine Art Fair in Johannesburg

In sy vyfde jaar is die Turbine Art Fair in Johannesburg gewild as ’n eenstopgeleentheid vir bekostigbare Suid-Afrikaanse kuns

Deur JOHAN MYBURG

Kunshandel, soos dit jare lank bedryf is, het asof oornag ’n verandering ondergaan wat dit met mening in die arena van markte ingepluk het. Die laaste paar jaar is dié brug oorgesteek: van transaksies in galerye tot die ekonomiese model van kunsmarkte, of art fairs, soos dit ook heet.

Tien jaar gelede was daar tien internasionale kunsmarkte/kunsskoue. Nou is daar meer as 60 en oënskynlik g’n keer aan die sukses van dié model nie. Dié skoue is deesdae die plek waar galerye én kunstenaars klante deeglik van hul teenwoordigheid bewus maak. Kunsskoue is ’n logiese ontwikkeling in ’n era van globalisering, digitale onmiddellikheid en direkte toegang tot die kunstenaar – en sy of haar ateljee – deur middel van sosiale media. Die koperspubliek wil nie meer die kunswerk deur die bemiddeling van die galery bekom nie, maar direk met die kunstenaar kontak maak, en op die koop toe ook Facebookvriende word. Boonop val dié ontwikkeling met ’n tyd saam waarin kuns ’n sexy kommoditeit geword het met heelwat sosiale status daaraan gekoppel.

Kontemporêre kuns het die voertuig geword waarmee etlike glansryke reise onderneem kan word, van die een sosiale geleentheid ná die ander – met die kunsskou as een van die blinkste bestemmings op dié roete. Vyf jaar gelede het die Turbine Art Fair in Johannesburg dié model op klein skaal aangedurf en gou as ’n eenstopgeleentheid vir bekostigbare Suid-Afrikaanse kuns gewild geraak. Die First Access-ervaring op die Donderdagaand voor die skounaweek is dié geleentheid waar kameras kliek en selfoonnommers uitgeruil word. En waar kuns gekoop word. Tot en met die einde van die skou is die Turbine Hall in Newtown met musiek, goeie kos, kuns en gesprekke – informele sowel as formele gesprekke – oor kuns gevul.

LEES OOK: Cape Town Art Fair

Die kuns van kuns versamel word in drie gesprekke uitgepluis, aangebied deur Artinsure, met Makgati Molebatsi as aanbieder. Bekende versamelaars soos Tshepo Hlongwane, onder meer stigter van Browneyedboy, ’n broeikas vir nuwe idees, en prokureur Dawood Petersen praat oor hul versamelings, hoe hulle begin het en watter kuns hulle aantrek. Die Johannesburgse eiendomsontwikkelaar Anton Taljaard vertoon ’n deel van sy Pierneef-versameling op die skou. Taljaard was 13 toe hy sy eerste kunswerk, ’n Pierneef-linodruk, gekoop het. Hoewel hy ook kontemporêre kuns aankoop, het hy in sy versameling voorbeelde in al die mediums waarin Pierneef gewerk het. Rolihlahla Mhlanga is vanjaar vir ’n tweede keer verantwoordelik vir Fresh Produce, ’n uitstalling van jong kunstenaars, geborg deur Rand Merchant Bank. Mhlanga is die medestigter van Eyethu, ’n galery wat onder sy kuratorskap ’n uitstalling van Suid-Afrikaanse kuns op die agste Gorée-diasporafees in Senegal aangebied het.

Die werk van 15 jong kunstenaars is vir vanjaar se aflewering van Fresh Produce ingesluit: Johan Stegmann, Alexander von Klitzing, Katlego Modiri, Nkhensani Rihlampfu, Claudia Monyama, Sechaba Meloa, Odette Graskie, Mmabatho Mokalapa, Mary-Lee Makunye, Nosipho Nombuso Maseko, Lutendo Malatji, Chrisél van der Merwe, Kiyara Ananmalay, Isaac Zavale en Jodi Tracey. Dié kunstenaars het die afgelope ses maande via Assemblage in Johannesburg en in samewerking met die Visual Art Network of South Africa (Vansa) aan ’n intensiewe program deelgeneem, gemik op die integrering van die praktiese kant van kuns met die professionele kunspraktyk. Die oogmerk van die program is om kunstenaars toe te rus met alles wat hulle vir ’n volhoubare loopbaan in die kunsbedryf nodig het. Besoek www.turbineartfair. co.za vir nog inligting  Die Turbine Art Fair word van 13-16 Julie gehou