Brei: met jou vingers

Benodigdhede

1 bal elk ELLE PURE GOLD CHUNKY in Chilli, Terracota en Taupe of enige drie kleure Chunky-breidraad

Aanwysings

1. Knyp die breidraad met jou duim vas met jou palm na bo.
2. Vat die draad onder jou wysvinger deur, bo-oor jou middelvinger, onder jou ringvinger deur bo-oor en om jou pinkie, dan terug bo-oor jou ringvinger, onder jou middelvinger deur, bo-oor jou wysvinger. Daar is nou een steek op elke vinger.
3. Vat die draad om jou wysvinger, bo-oor jou middelvinger, onder jou ringvinger, bo-oor om jou pinkie, bo-oor ringvinger, onder middelvinger, bo-oor wysvinger. Daar is nou twee steke op elke vinger.
4. Begin by die pinkie, trek onderste steek oor boonste steek en af van vinger af, doen dieselfde met ringvinger, middelvinger en wysvinger. Eerste ry gemaak en weer net een steek op elke vinger.
5. Vat draad bo-oor jou middelvinger, onder jou ringvinger, bo-oor om jou pinkie, bo-oor ringvinger, onder middelvinger, bo-oor wysvinger. Daar is nou weer twee steke op elke vinger. Herhaal stap 4 en 5 tot string ongeveer 4 meter lank is.
6. Eindig af deur pinkie se steek op ringvinger te sit en onderste steek oor te trek. Herh met res van steke. Breek draad, ryg deur laaste steek en trek styf.

Om te voltooi

Steek die drie stringe met steekhouer langs mekaar vas en sit dit iewers vas. Vleg die drie stringe tot op punt. Werk begin- en eindpunte aan hul ooreenstemmende kleur vas. Draai drie tot vyf keer om nek soos verkies.