Jy kan inderdaad iets doen om kardiovaskulêre siektes te voorkom.
Christa Swanepoel
Nestlé sê wat jy kan verander en waaraan jy niks kan doen nie:
| Wat jy kan verander | Wat jy nie kan verander nie |
| · Rook | · Familiegeskiedenis van hartsiektes en etnisiteit |
| · Hoë bloeddruk | · Ouderdom |
| · Hoë cholesterol | · Geslag |
| · Oorgewig | · Liggaamsvorm (appelvorms se risiko is groter as peervorms s’n) |
| · Swak dieet | |
| · Tipe-2-diabetes | |
| · Onvoldoende aktiwiteit | |
| · Depressie, sosiale isolasie en min sosiale interaksie | |
| · Oormatige alkoholinname |
Baie Suid-Afrikaners het minstens een van hierdie risikofaktore; hoe meer jy het, hoe groter is jou kanse om kardiovaskulêre hartsiektes op te doen. Maar as jy ’n gebalanseerde dieet volg en jou gewig dophou, kan jy dit tot ’n groot mate voorkom, sê Naazneen Khan, ’n bestuurder by Nestlé.
Hier is nog wenke
• Sluit ’n verskeidenheid kosse by jou dieet in.
• Maak (veselryke) styselkos die basis van die meeste maaltye.
• Eet daagliks vyf porsies groente of vrugte.
• Sluit vis soos salm en sardiens minstens twee keer per week by jou dieet in en beperk rooivleis tot twee tot drie keer per week. Gebruik maer snitte en verwyder sigbare vet.
• Beperk pasteie, koekies, oliebolle en slaptjips.
• Beperk kos hoog aan cholesterol soos rooivleis en garnale.
• Maak kos gaar deur dit te bak, rooster of stowe of gebruik kleefvrye olie of panne.
• Eet twee keer per week peulgroente in die plek van rooivleis.
• Gebruik laevet- of vetvrye melk.
• Moenie ekstra sout aan tafel gebruik nie. Geur jou kos met kruie, knoffel, uie, rissies of suurlemoen.
• Gebruik alkohol matig.
• Beheer jou gewig deur gereelde fisieke aktiwiteit 30 minute per dag.
• Hou op rook of rook minder.
“Hartsiektes is een van die groot risikofaktore vir hartaanvalle en beroerte. Leef gesond en laat jou dokter gereeld jou bloeddruk, cholesterol- en glukosevlakke toets,” sê Nazneen.
MEER INLIGTING
Vir nog wenke oor hoe om gesonder te leef, besoek www.nestle.co.za/nhw en www.welnesiq.org
