Die woord bruschetta is afgelei van die werkwoord bruscare, wat beteken “om oor kole te rooster” en verwys na geroosterde snye brood met ‘n verskeidenheid vulsels. En dis juis waar dit lekker raak – mens kan maar kreatief raak en allerhande bestanddele probeer.
Om die bruschetta te maak:
Sny ‘n ciabatta-brood in snye en rooster dit weerskante op ‘n grill-pan tot goudbruin.
Meng gelyke hoeveelhede suurlemoen en olyfolie en smeer die brood soos hulle van die hitte afgehaal word.
Nou is die bruschetta gereed vir vulsels. Probeer dié gemarineerde eiervrug en kersietamaties of die pestosampioene:
Om die gemarineerde eiervrug en kersietamaties te maak:
Sny een eiervrug in dun skywe van ongeveer 3 mm. Sprinkel met sout en pak in ‘n vergiettes. Laat dit minstens 15 minute staan, spoel dan af en druk droog met ‘n vadoek. Braai die skywe in ‘n bietjie olyfolie tot gaar en goudbruin.
Meng 30 ml olyfolie, 15 ml suurlemoensap en 15 ml rooiwynasyn, en gooi oor die eiervrugskywe. Sny 200 g kersietamaties in die helfte en voeg by die eiervrug. Geur met sout en varsgemaalde swartpeper. Hoewel jy dit dadelik kan eet, raak dit net lekkerder as dit ten minste so halfuur staan.
Plaas ‘n roket- of jong spinasieblaar op die bruschetta en skep dan van die gemarineerde eiervrug en kersietamaties op. Rasper parmesaankaas oor.
Om die pestosampioene te maak:
Kap sampioene rofweg en braai teen ‘n hoë hitte in ‘n bietjie olie en margarien of botter in ‘n braaipan. Voeg ‘n teelepel of twee basiliekruidpesto* by en geur met sout en varsgemaalde swartpeper.
Skep op ‘n broodjie en rasper parmesaan- of pecorinokaas mildelik oor.
Dis ‘n goeie metode om verskillende sampioene te leer ken – gebruik ‘n verskeidenheid sampioene.
