Wat jy eet beïnvloed die stand van die planeet. CORNÉ COETZEE vertel ons hier oor die 3000 myl-slaai. Lees meer in ons 17 Julie-uitgawe
Corné Coetzee
Mense het internasionaal begin handel dryf kort nadat kamele meer as 3 000 jaar gelede in Arabië makgemaak is en veral toe skeepsvaart ontwikkel het. Eers meestal met juwele en kosbare metale, materiaal soos sy, en speserye. Later het ander kossoorte gekom soos suiker, tee, koffie en kakao.
Vandag reken mense dat die gemiddelde Amerikaanse maal meer as 2 400 km van die plaas na die etenstafel reis. Dié afstand word “kosmyle” genoem. Die skrywer en sosioloog James Kunstler het glo die frase “die 3 000 myl-Caesar-slaai” uitgedink om mense bewus te maak daarvan dat baie min van ons kos – droog, geprosesseer óf vars – nog plaaslik geproduseer of gekweek word.
Barbara Kingsolver skryf in haar boek Animal, Vegetable, Miracle dat sy jammer voel vir mense wat nie die smaak van ’n vars aspersie ken nie, want dié lentegroente word net vir ’n klompie weke per jaar geoes (in Suid-Afrika van die einde van September af) en hoe varser, hoe smaakliker. Die meeste aspersies “het hul kosbare jeug in ’n treinwa deurgebring”, sê Barbara.
Dis egter nie die kosmyle nie, maar die manier waarop kos geproduseer word, wat die meeste tot die algehele CO²- en watervoetspoor bydra.
