Daar is vanjaar nie minder nie as elf splinternuwe produksies by Clover Aardklop te sien.
Onder die produksies is daar drama en komedie, ligte musiek en klassieke musiek en van die groot name in die Suid-Afrikaanse vermaakwêreld soos Sandra Prinsloo, Laurika Rauch en Rocco de Villiers maak weer almal ’n draai by Clover Aardklop. Drie bekendes in 7de Laan is ook op die fees te sien: Annelisa Weiland, Diaan Lawrenson en Chris Vorster!
Op die dramafront is Hemelruim ’n moet-sien. Mariaan en Roelof ontmoet by ‘n braai. Hy is ’n sukkelende byeboer, sy is ’n lektor in kosmologie aan die Universiteit van Kaapstad. Hemelruim is ’n verhaal oor die heelal, liefde en heuning. Die teks is deur Nick Payne en Nico Scheepers het dit in Afrikaans vertaal. Scheepers is ook die regisseur en die spelers is Tinarie van Wyk-Loots en Paul du Toit.
Aartappels en ammo, ’n komedie, het 7de Laan se Chris Vorster as akteur, skrywer en regisseur. ’n Desperate TV-joernalis dokumenteer ’n groep Suid-Afrikaners wat opgaar vir die Groot Ramp. Maar wat gebeur as ons held opgevreet en uitgespoeg word deur ‘n wêreld waarvoor hy nie mal of mans genoeg is nie?
Vir die drama Jani het die dramaturg Saartjie Botha Jani Allen se veelbesproke boek geneem en dit in ’n eenvroustuk omskep. Allen was baie se liefling en uitgesproke teenoor almal, ‘n intelligente kommentator en taalvirtuoos. Dinge loop egter skeef en sy wyk uit na Amerika waar sy op 63 as kelnerin begin werk. Jani bied ‘n ironiese terugblik, met vlymskerp humor, op dié merkwaardige vrou se lewe. Met Sandra Prinsloo in die rol van Jani en Christiaan Olwagen as regisseur.
Klein jakkalsies is nog ’n nuwe komedie op die fees. ‘n Paartjie (Diaan Lawrenson en Jody Abrahams) ontmoet, raak verlief en trou. Die eerste drie jaar is een lang wittebrood, maar dan begin die klein jakkalsies die een na die ander by die huwelik instap… Die teks en regie is deur Leon Kruger.
Maggie is pas ontslaan uit die rehabilitasiesentrum en probeer haar voete vind. Haar ma is ‘n beroemde aktrise wat oënskynlik die hoogste kruin in haar lewe bereik het, maar nie die eensaamheid óf die ouderdom kan besweer nie. Dit is die tema van Ma!, met ‘n teks deur Marida Swanepoel, met Gert van Niekerk as regisseur en die twee hoofrolle word deur Annelisa Weiland en Franci Swanepoel gespeel. Die stuk ondersoek die komplekse verhouding tussen ma en dogter en sal spreek tot meeste ouers en hul kinders.
In Totius: Die rus is elders word die lewe en werk van Totius gevier met vertellings en gedigte wat getoonset is. ‘n Opsionele en insiggewende toer deur die huis waarin Totius gewoon het, volg ná afloop van die produksie. Met Olga Leonard, Babette Viljoen, Izelle Claassen en Louis van Niekerk as die verteller. Die teks en regie is deur Pierre-André Viviers.
Rocco de Villiers is terug by Clover Aardklop met Beautiful Beautiful Hymns. Hierdie program sluit gewyde liedere in soos Amazing Grace, Jerusalem, Hoe groot is U, Onse Vader en Stille Nag in. Daar is benewens die klavier, ook ‘n orrel, strykers en ‘n doedelsak te hoor.
Die Grond van die wind is ‘n uitsonderlike produksie wat die verhaal vertel van ‘n groep Afrikaner-bittereinders wat in April 1903 in Patagonië aangekom het. Dié produksie neem jou op ‘n pelgrimstog van geluk en hartseer, van Suid-Afrika se konsentrasiekampe tot Argentinië se pampas-vlaktes. Met Drikus Volschenk (sang), ‘n mannekoor, CH2, Kobus van der Walt (baskitaar), Sergio Zampolli (trekklavier), Matthys Coetzee (tjello) en Awie van Wyk en Coenraad Rall op klavier. Die musiekregie is deur Awie van Wyk en die regisseur is Elize Cawood.
Laurika Rauch is by Clover Aardklop met Nie as ek sing nie. Laurika was nege jaar gelede by Aardklop en vanjaar is sy daar met slegs twee vertonings. Nie as ek sing nie bevat outobiografiese elemente en neem jou terug na waar alles begin het, die dae van Mpanzaville, Atlantis en Stuur vir my ‘n foto. Met Devereaux van der Hoven-Oosthuizen (klavier) en Juan Oosthuizen (kitaar).
‘n Musikale reis deur die eeue is ‘n program vir koor en orkes met musiek van Bach, Haydn en Mozart sowel as eietydse werk, onder meer die wêreldpremière van die Suid-Afrikaanse komponis Peter Klatzow se nuwe werk. Met die NWU se Puk-koor en –simfonieorkes.
In Tjello en orrel span die internasionaal gerekende tjellis Anzél Gerber kragte saam met die orrelis Zorada Temmingh vir ‘n program wat werk deur Vivaldi, Schumann, Fauré asook Hendrik Hofmeyr se aangrypende Crucifixus insluit. Hierdie is ‘n eenmalige opvoering en feesgangers sal vinnig moet spring om kaartjies te kry.
