Tuwa, Bodium, Bell en Lover’s Twist is name met ’n sweem van romantiek. Maar die harde landskap van die landelike Oos-Kaap vertel ’n ander storie. Dié plekkies, almal ’n hanetree van Hamburg aan die oewer van die Keiskamma, ken die kwesbaarheid wat armoede bring.
Johan Myburg
Halfpad tussen Oos-Londen en Port Alfred lê Hamburg aan die see, afgeleë en met min geleenthede vir jong mense. Volop is egter werkloosheid, tienerswangerskappe, MIV/vigs, vroeë skoolverlaters.
Dis in dié omgewing waar Helen Vosloo in 2006 die Keiskamma-musiekakademie begin het. Omdat sy, soos die Britse opvoedkundige sir Ken Robinson, glo dat musiek en ander kunste deel moet wees van opvoeding. “Tradisioneel gesien groei ons nie in kreatiwiteit nie, ons groei eerder daaruit,” meen Robinson. “Of eerder, ons word daar úít geleer. Onderwysstelsels het almal dieselfde hiërargie: heelbo wiskunde en taal, en heel onder die kunste.”
In 2002 het Vosloo die geleentheid gehad om saam met die Tapiola Sinfonietta, ’n Finse kamerorkes, te werk. By haar terugkeer na Suid-Afrika wou sy iets van dié ervaring met Suid-Afrikaners deel: “Ek wou die noodsaak vir musiekonderrig deel met kinders wat dit voorheen en nog steeds moes ontbeer.”
Vier jaar later het sy vlerke gegee aan dié droom.
Die Keiskamma-musiekakademie is deel van die Keiskamma Trust, ’n ondermening waarmee Carol Hofmeyr, ’n mediese dokter, in 2000 begin het. Hofmeyr se oogmerk was om aan dié verarmde gemeenskap uitkoms en hoop te bied deur die kunste. Sy het begin met die Keiskamma-borduurprojek en uit dié het onder meer die bekende Keiskamma-altaarstuk gekom. Nie lank nadat hulle saam begin kunswerke maak nie, het die grusame impak van MIV/vigs onder die kunstenaars en borduurders se familielede, Hofmeyr genoop om as mediese dokter haar gemeenskap te help.
Anthony Drake is tans die hoof van die musiekakademie. Vosloo is steeds op die raad van die Keiskamma Trust.
Wie is Helen Vosloo?
Vosloo is een van Suid-Afrika se voorste musici en was jare lank die Johannesburg Philharmonic se hooffluitspeler. Daarby vorm sy saam met Malcolm Nay (klavier) en Marian Lewin (tjello) die hoog aangeskrewe Trio Hemanay.
Sy het talle studietoere na Europa en die VSA onderneem en saam met vooraanstaande fluitspelers soos William Bennett in Londen en Peter Lukas Graf in Switserland gewerk.
In 2006 het sy die akademie met 12 leerlinge begin. Verlede jaar was daar 106. In 2009 was 23 leerlinge die eerstes om gr 1 (Unisa) te slaag. Vanjaar word gr 7 vir die eerste keer aangebied.
Anthony Drake begin eersdaags met ‘n strykprogram in Peddie.
Waarom ’n musiekakademie?
“Die geleentheid van musiekopvoeding bied talle voordele,” sê Vosloo. “Die geleentheid aan leerlinge om hulself uit te druk deur hulle instrument en deur in konserte te speel vergroot hulle siening van die wêreld. Dit stel die leerlinge ook bloot aan ‘n nuwe soort dissipline.
“Keiskamma Trust se leuse is dat die kunste aan mense hoop gee. So het musiek die vermoë om betekenis te gee: Stel jouself voor, ‘n plaaslike kind met min geleentheid om die buitewêreld te ervaar, bestudeer getrou haar instrument in haar village deur daagliks te oefen en ‘n klomp lesse per week by te woon. Sy gaan speel voor ’n gehoor in die stad, wat aan die einde van die konsert vir haar en haar maatjies ’n staande ovasie gee… Stel jou voor die impak in selfvertroue vir die jong spelers. Vir die jong Keiskamma-musikante bly dit ’n lewensgroot ervaring wat hulle versterk in hulle eie selfwees.”
Vosloo benadruk egter dat “die Akademie haar sukses nie net aan eksamenuitslae, sertifikate op eisteddfods of applous tydens optredes meet nie. Sukses word ook gemeet aan die persoonlike groei van haar leeringe.”
Kyk na ’n kort video met ’n optrede deur die Keiskamma-musiekakademie
Jen Hoyer en ’n groep beginners.
Foto: Sarah Weihermeuller
Die onderwysers wat betrokke is by die akademie is: Laura Osterlund, Priscilla Glover, Stephen Holder, Megan Hartley, Anthony Drake, Oliviera Nikolic, Elizabeth Winkelman
Vir nog inligting oor die Keiskamma-musiekakademie besoek www.keiskamma.org of kontak Anthony Drake by [email protected].
SOURCES
Sarah Weihermeuller en verskaf
