Johan Myburg skryf oor die mense (en hul boeke) wat rotstekeninge populêr bekend gestel het.
Bert Woodhouse (1919-2011) is die skrywer wat die meeste gedoen het om Suid-Afrikaanse rotskuns hier en wêreldwyd populêr bekend te stel.
As amateur – hy het nooit argeologie formeel bestudeer nie – het hy sy navorsing in sy vrye tyd gedoen. Hy het in die bankwese en later in die konstruksiebedryf gewerk en al sy navorsingsprojekte self gefinansier.
Vir dié navorsingswerk is hy in 1996 deur die internasionale federasie vir rotskuns vereer en tien jaar later het hy die Orde van Ikhamanga ontvang vir sy “uitmuntende bydrae tot die bewaring van rotskuns”.
Die boek waarna verwys word in Vrouekeur van 5 September is The Rain and its Creatures, As the Bushmen Painted Them, uitgegee deur William Waterman Publications (1992), ISBN: 9-780958-325226.
In sy Songlines (1968), ’n werk waarin die Britse skrywer en reisiger Bruce Chatwin (1940-1989) fiksie en nie-fiksie kombineer, skryf hy oor die Australiese inboorlinge se skeppingsmite. Chatwin skryf vanuit die perspektief van ’n inboorling, maar in die boek vleg hy ook verhale van sy eie reise in sowel as sy siening van die mense se lang nomadiese verlede.
Songlines is beskikbaar in die Penguin Classics-reeks, ISBN: 9780142422571.
