In ‘n kort bespreking in die Britse dagblad The Guardian is Kristian Bezuidenhout onlangs beskryf as “die voorste fortepianis van sy geslag”. Dié bespreking het saamgeval met sy uitreiking van onder meer Mozart se Sonate in C, K545.

JOHAN MYBURG

“Die artikulasie,” lui die bespreking, “is skitterend en die ornamentasie is netjies; die stadige bewegings sing soos arias en hy geniet duidelik die gewig wat hy gee aan die Rondo-temas; virtuositeit borrel onder die oppervlak hoewel dit nooit die fokuspunt word nie. Op sy moderne klawerbord – ‘n Tsjeggiese weergawe van ‘n Weense instrument wat van 1805 dateer – is die klank soet en neutering. Bowenal weet Bezuidenhout hoe om ‘n fortepiano* te laat sing.”

Bezuidenhout (36) is in Dundee in KwaZulu-Natal gebore waar sy ouers onderwysers was. Toe hy agt was het sy gesin na Australië verhuis. Van Suid-Afrika het hy min herinneringe, sê hy. Dit was in Australië waar hy met sy musiekopleiding begin het.

Wat het hom laat besluit op die fortepiano en veral die musiek van Mozart? As jong seun het hy kennis gemaak met ‘n opname van Mozart-concertos deur John Eliot Gardiner en die Amerikaanse pianis Malcolm Bilson. “Ek was betower deur die wisselwerking van die klavier en die houtblasers, en die klavier wat as’t ware deel word van die orkes,” het hy in ‘n onderhoud gesê. “Ek wou dit terstond ook doen.”

Hoewel hy toe 12 was, het hy dié droom getrou nagejaag en in 1997 het hy sy musiekstudie aan die Eastman-musiekskool in New York voortgesit.

Ná sy aanvanklike les in klavier het hy onder leiding van Arthur Haas die klavesimbel bemeester en toe onder leiding van die einste Malcolm Bilson die fortepiano en die continuo onder leiding van Paul O’Dette, die luitspeler en musikoloog wat spesialiseer in vroeë musiek.

Bezuidenhout het op 21 die eerste prys gewen op die Festival Musica Antiqua, ‘n internasionale fortepiano-kompetisie in Brugge, België. In 2006 is hy deur die Nederlandse federasie vir musiek en drama aangewys as “die opwindendste jong musikus” en die volgende jaar het hy die gesogte Erwin Bodky-prys vir klavesimbel in ontvang. Dié prys word toegeken aan musici wat uitblink in die veld van vroeë musiek.

Deesdae woon Bezuidenhout in Londen vanwaar hy gereeld as gaskunstenaar in Europa optree, as solis sowel as leier van ensembles soos die Freiburg-Barokorkes, die Orchestre des Champs Elysées, Royal Concertgebouw-orkes, Concerto Köln, die Chamber Orchestra of Europe en die Nederlandse Radio Filharmoniese Orkes. Onder die beroemdes met wie hy saamgewerk het tel kunstenaars soos John Eliot Gardiner, Philippe Herreweghe, Frans Brüggen, Trevor Pinnock, Jean-Guihen Queyras, Isabelle Faust, Alina Ibragimova, Rachel Podger, Carolyn Sampson, Anne Sophie von Otter en Mark Padmore.

Hy is gasprofessor aan die Schola Cantorum in Basel, Switserland, sy alma mater, die Eastman School of Music in Rochester, New York en artistieke adviseur van die Constellation Center in Cambridge, Massachusetts.

*Die fortepiano is die voorloper van die klavier. Dié kleiner instrument was popular in die laat 1700’s en die vroeë 1800’s – die era wat alom bekend staan as die Klassieke tydperk.

Oorweeg dié opname

In die Volume 7-opname vir Harmonia Mundi speel Kristian Bezuidenhout die volgende werke van Mozart: Sonate no. 6 in D, K284 (“Dürnitz”), Sonate no. 8 in a, K310, Ses variasies K180 (“Mio caro Adone”) en die Nege variasies in C op ‘n tema van Nicolas Dezede, “Lison dormait”, K264.

Van dié CD, Mozart: Keyboard Music Volume 7, het Gramophone in Februarie 2015 geskryf: “…’n mens kan jouself kwalik keer om nie oor en oor na dié uitvoerings te luister nie omdat dit so ver in die musiek in dring en dit wat jy gedink het jy weet op die kop keer…”

Kyk na Kristian Bezuidenhout se inleiding tot die fortepiano.
[iframe width=”420″ height=”315″ src=”https://www.youtube.com/embed/6UQM1YGDe5w?rel=0″ frameborder=”0″ allowfullscreen=””]
 

Kyk hier na ‘n opname van Mozart se Klavierkonsert no. 22 in E-mol, K482.
Die solis en dirigent is Kristian Bezuidenhout saam met die Freiburg-Barokorkes.