NRG se splinternuwe musiekvideo wil jou op ‘n emosiebelaaide rit neem
Met die maak van hul jongste musiekvideo het NRG persoonlik die stuur van die videoproduksieproses oorgeneem om te verseker hul splinternuwe enkelsnit, Kan jou nie keer, word uitgebeeld soos hulle dit gevisualiseer het.
NRG se visie vir hul jongste musiekvideo is om die kyker op ’n emosiebelaaide rit te neem waarin die liefde se struwelinge weergegee word. Dié trio, bestaande uit Christiaan ‘Wolf’ Botha, AB Kenobi en Mnr Stephantasties, sê hulle wou die normale produksieproses uitdaag en ná ’n paar dae se harde werk is hulle met die resultaat tevrede.
Kan jou nie keer is ’n laertempostuk oor ’n hart wat vir liefde gesluit is, maar die risiko loop om "die een" te verloor. Dit wissel van ’n klavier- en sangsolo na ’n ryk vermenging van sintetiese klanke en harmonieë.
